सोलापूर: कै. सिध्दाराम साखरे यांच्या स्मरणार्थ आणि महाराष्ट्र राज्य कुस्तीगीर संघ यांच्या संयुक्त विद्यमाने २८ व २९ मार्च रोजी हरिभाई देवकरण प्रशालेत चौथ्या महिला महाराष्ट्र केसरी कुस्ती स्पर्धेचे आयोजन करण्यात आल्याची माहिती निर्झरा केअर फाऊंडेशनच्या अध्यक्षा स्वाती अळ्ळीमोरे-साखरे यांनी दिली. याचवेळी विविध गटांतील पुरुष कुस्ती स्पर्धाही याच वेळी पार पडणार आहेत.
या स्पर्धेच्या उद्घाटन सोहळ्यास ग्रामविकास मंत्री तथा सोलापूरचे पालकमंत्री जयकुमार गोरे, सार्वजनिक आरोग्य राज्यमंत्री मेघना बोर्डीकर, आमदार सचिन कल्याणशेट्टी यांच्यासह महाराष्ट्र राज्य कुस्तीगीर संघाचे पदाधिकारी उपस्थित राहणार आहेत. यावेळी केंद्रीय मंत्री मुरलीधर मोहोळ, महाराष्ट्र राज्य कुस्तीगीर संघाचे अध्यक्ष रामदास तडस, कार्याध्यक्ष संदीप भोंडवे, सरचिटणीस योगेश दोडके, जिल्हाध्यक्ष अस्लम काझी यांची उपस्थिती लाभणार आहे.
कार्यक्रमास खासदार डॉ. ज्योती वाघमारे, आमदार सर्वश्री देवेंद्र कोठे, सुभाष देशमुख, दिलीपराव सोपल, बाबासाहेब देशमुख, राजू खरे, विजयकुमार देशमुख, समाधान आवताडे, नारायण पाटील, उत्तमराव जानकर, जिल्हा परिषद अध्यक्ष दीपक वैद्य आणि महापौर विनायक कोंड्याल यांच्यासह बाजार समिती सभापती दिलीप माने, माजी आमदार प्रशांत परिचारक, स्वामी समर्थ अन्नछत्र मंडळाचे अध्यक्ष जनमेंजयराजे भोसले, शहाजी पवार, भाजपा शहराध्यक्ष रोहिणी तडवळकर, उपमहाराष्ट्र केसरी भरत मेकाले उपस्थित राहणार आहेत. तसेच जिल्हाधिकारी कुमार आशीर्वाद, आयुक्त डॉ. सचिन ओंबासे, मुख्य कार्यकारी अधिकारी कुलदीप जंगम, पोलीस आयुक्त एस. राजकुमार आणि पोलीस अधीक्षक अतुल कुलकर्णी हेही उपस्थित राहणार आहेत.
महिला महाराष्ट्र केसरी स्पर्धेत खुल्या वजन गटासह ५०, ५३, ५५, ५७, ५९, ६२, ६५, ६८, ७२ अशा विविध वजन गटांमध्ये सामने रंगणार आहेत. विजेत्यांना कार आणि उपविजेत्यास बुलेट प्रदान करण्यात येणार आहे. पुरुष गटात २५ ते ३०, ३१ ते ३५, ३६ ते ४०, ४१ ते ४५, ४६ ते ५०, ५१ ते ५५, ५६ ते ६०, ६१ ते ६५, ६६ ते ७०, ७१ ते ७५, ७६ ते ८०, ८१ ते ९० आणि ९१ ते ११० किलो तसेच खुल्या गटात स्पर्धा होणार आहेत. पत्रकार परिषदेस केदारलिंग विभुते, सोमनाथ पटणे, सत्येन जाधव, भरत मेकाले, मनोज घोडके, लक्ष्मण सरवदे आदी उपस्थित होते.
