औरंगाबाद(प्रतिनिधी): गरवारे क्रिकेट संकुलावर सुरू असलेल्या कास्मो फिल्म प्रायोजित व शहीद भगतसिंह क्रीडा व सांस्कृतिक मंडळातर्फे आयोजित ३० व्या शहीद भगतसिंह टी-२० क्रिकेट स्पर्धेच्या अंतिम फेरीत ग्रामीण पोलीस व शहर पोलीस संघ विजेतेपदासाठी झूंजणार आहेत. रविवार ३ एप्रिल रोजी हा अंतिम सामना होईल. पहिल्या उपांत्य सामन्यात शहर पोलीस संघाने एनआरबी संघावर ६ गडी राखून विजयी मिळवला. दुसऱ्या सामन्यात ग्रामीण पोलीस संघाने मसीआ ‘ब’ संघावर ४९ धावांनी विजय संपादन केला. अाजचा सामन्यात राजू परचाके व विकास नगरकर सामनावीर ठरले.
नाणेफेक जिंकून एनआरबी संघाने प्रथम फलंदाजी करताना निर्धारित २० षटकात सर्वबाद १३३ धावा केल्या. यामध्ये विनोद लंबेने ४९ चेंडूत १ षटकार व ७ चौकारांसह ५८ धावा काढल्या. सचिन शेंडगेने १९ चेंडूत ४ चौकारांसह २३ धावा, शुभम हरकलने १९ चेंडूत १ षटकार व २ चौकारांसह २२ धावा तर रुद्राक्ष बोडकेने ८ चेंडूत ३ चौकारांसह १५ धावांचे योगदान दिले. शहर पोलीसकडून राजू परचाकेने केवळ ३२ धावात ४ महत्त्वपूर्ण गडी त्रिफळाचीत केले. शेख जिलानीने १७ धावात २ गडी इशांत राय व राहुल जोनवाल यांनी प्रत्येकी १ गडी बाद केला. प्रत्युत्तरात शहर पोलीस संघाने विजयी लक्ष केवळ १५ षटकात ४ गड्यांच्या मोबदल्यात पूर्ण केले. आर्यन शेजुळने अप्रतिम फलंदाजी करताना केवळ ३९ चेंडूत ३ उत्तुंग षटकार व ६ चौकारांसह ६३ धावा, रिजवान अहेमदने २४ चेंडूत ४ चौकारांसह २७ धावा तर राहुल जोनवालने १३ चेंडूत १ चौकारासह १५ धावांचे योगदान दिले. एनआरबी संघातर्फे गोलंदाजी करताना कर्णधार प्रशांत काकडेने २८ धावात २ गडी तर व्यंकटेश सोनवलकरने १ गडी बाद केला.
विकास नगरकरची अष्टपैलू कामगिरी :
दुसऱ्या उपांत्या सामन्यात ग्रामीण पोलीस संघाने नाणेफेक जिंकून प्रथम फलंदाजी करताना निर्धारित २० षटकात ७ बाद २०१ धावा केल्या. यामध्ये अजय काळेने ३६ चेंडूत ९ चौकारांसह ६१ धावांची खेळी केली. इम्रान खानने २९ चेंडूत १ षटकार व ४ चौकारांसह नाबाद ४७ धावा, विशाल नरवडेने २६ चेंडूत १ षटकार व ५ चौकारांसह ४२ धावा तर विकास नगरकरने १८ चेंडूत २ चौकारांसह २३ धावांचे योगदान दिले. मसीआ ‘ब’ संघातर्फे गोलंदाजी करताना कर्णधार मंगेश नितुरकरने ३३ धावांत २ गडी, मधुर पटेलने ३६ धावांत २ गडी, राम राठोडने ३० धावात २ गडी बाद केले. प्रत्युत्तरात मसीआ ‘ब’ संघ १९ षटकात १५२ धावांवर ढेपाळला. यामध्ये निकीत चौधरीने २४ चेंडूत ३ चौकारांसह २४ धावा, मधुर पटेलने १६ चेंडूत १ षटकार व २ चौकारांसह २२ धावा, संदीप गायकवाडने २० चेंडूत १ षटकार व ३ चौकारांसह २२ धावा, कर्णधार मंगेश नितुरकरने १५ चेंडूत १ षटकार व २ चौकारांसह २० धावा तर मयूर चौधरीने ८ चेंडूत १ षटकार व १ चौकारांसह १५ धावांचे योगदान दिले. ग्रामीण पोलीस संघातर्फे विकास नगरकरने २३ धावात ४ गडी, कर्णधार संदीप जाधवने ४८ धावात ४ गडी तर इम्रान खानने १८ धावांत २ गडी बाद केले.
