स्पोर्ट्स पॅनोरमा | वृत्तसेवा
फिफा विश्वचषक 2026 मध्ये अमेरिकेचा स्ट्रायकर फोलेरिन बालोगन याने एकाच सामन्यात इतिहास रचला. बोस्निया आणि हर्झेगोविनाविरुद्धच्या राऊंड ऑफ 32 सामन्यात गोल केल्यानंतर रेड कार्ड मिळाल्याने विश्वचषकाच्या नॉकआउट फेरीत अशी दुर्मिळ नोंद करणारा तो केवळ चौथा खेळाडू ठरला.
सामन्याच्या पहिल्या सत्रात बालोगनने आक्रमक खेळ करत 31 व्या मिनिटाला चेंडू जाळ्यात धाडला होता. मात्र, पंचांनी तो गोल ऑफसाईड ठरवला. त्यानंतर 45 व्या मिनिटाला त्याने पुन्हा अचूक फिनिश करत अमेरिकेला 1-0 अशी आघाडी मिळवून दिली. या स्पर्धेतील त्याचा हा तिसरा गोल ठरला.
मात्र, दुसऱ्या सत्रात अमेरिकेला मोठा धक्का बसला. 64 व्या मिनिटाच्या सुमारास बालोगनने बोस्नियाच्या तारिक मुहरेमोविचच्या घोट्यावर पाय ठेवल्याचे रेफरीच्या निदर्शनास आल्यानंतर त्याला थेट रेड कार्ड दाखवण्यात आले. त्यामुळे अमेरिकेला अखेरची 26 मिनिटे 10 खेळाडूंसह खेळावे लागले.
या रेड कार्डमुळे बालोगन पुढील राऊंड ऑफ 16 मधील बेल्जियमविरुद्धच्या महत्त्वाच्या सामन्याला मुकणार आहे. अमेरिकेसाठी हा मोठा धक्का मानला जात आहे.
विश्वचषकाच्या नॉकआउट सामन्यात गोल आणि रेड कार्ड अशी दुहेरी नोंद करणाऱ्या खेळाडूंच्या विशेष यादीत आता बालोगनचे नाव समाविष्ट झाले आहे.
विश्वचषकाच्या नॉकआउट फेरीत गोल करून रेड कार्ड मिळवणारे खेळाडू :
• गॅरिंचा (ब्राझील) – 1962 उपांत्य फेरी, चिलीविरुद्ध
• रोनाल्डिन्हो (ब्राझील) – 2002 उपांत्यपूर्व फेरी, इंग्लंडविरुद्ध
• झिनेदिन झिदान (फ्रान्स) – 2006 अंतिम सामना, इटलीविरुद्ध
• फोलेरिन बालोगन (अमेरिका) – 2026 राऊंड ऑफ 32, बोस्निया आणि हर्झेगोविनाविरुद्ध
याशिवाय, विश्वचषकाच्या इतिहासात रेड कार्ड मिळवणारा बालोगन हा अमेरिकेचा पाचवा खेळाडू ठरला. यापूर्वी 1990 मध्ये एरिक वायनाल्डा, 1994 मध्ये फर्नांडो क्लाविजो, 2006 मध्ये पाब्लो मास्ट्रोनी आणि एडी पोप यांना विश्वचषकात रेड कार्ड मिळाले होते.
बालोगनच्या अनुपस्थितीत बेल्जियमविरुद्धच्या बाद फेरीतील सामन्यात अमेरिकेच्या आक्रमणाची जबाबदारी इतर खेळाडूंवर असणार असून, प्रशिक्षकांसमोर संघरचनेचे मोठे आव्हान निर्माण झाले आहे.
