स्पोर्ट्स पॅनोरमा | क्रीडा वृत्त
क्रिकेटच्या इतिहासातील महत्त्वपूर्ण घडामोडीत LA28 लॉस एंजेलिस ऑलिम्पिक स्पर्धेतील पुरुष आणि महिला अशा दोन्ही टी-20 क्रिकेट स्पर्धांमध्ये प्रत्येकी सहा संघ सहभागी होणार असल्याची अधिकृत घोषणा करण्यात आली आहे. यासोबतच आंतरराष्ट्रीय क्रिकेट परिषदेने (ICC) आणि आंतरराष्ट्रीय ऑलिम्पिक समितीने (IOC) पात्रता प्रक्रियाही निश्चित केली आहे.
महिलांच्या स्पर्धेसाठी ऑस्ट्रेलिया, ग्रेट ब्रिटन, भारत आणि दक्षिण आफ्रिका या चार संघांनी आतापर्यंत आपले स्थान निश्चित केले आहे. उर्वरित दोन जागांसाठी ‘ICC Olympic Qualifier 2027’ ही नव्याने सुरू करण्यात आलेली पात्रता स्पर्धा आयोजित केली जाणार आहे. या स्पर्धेतून अंतिम दोन संघ LA28 ऑलिम्पिकचे तिकीट मिळवतील.
क्रिकेटचे ऑलिम्पिकमध्ये तब्बल १२८ वर्षांनंतर पुनरागमन होत असून, हा खेळ टी-20 स्वरूपात खेळवला जाणार आहे. यामुळे जगभरातील क्रिकेटप्रेमींमध्ये मोठा उत्साह निर्माण झाला आहे. ऑलिम्पिकसारख्या जागतिक व्यासपीठावर क्रिकेटला पुन्हा स्थान मिळणे हा खेळाच्या जागतिक विस्तारासाठी महत्त्वाचा टप्पा मानला जात आहे.
ICC चे अध्यक्ष जय शाह यांनी या निर्णयाचे स्वागत करत, “क्रिकेटच्या ऑलिम्पिक पुनरागमनासाठी हा ऐतिहासिक क्षण असून, नव्या पात्रता प्रक्रियेमुळे अधिक देशांना ऑलिम्पिकमध्ये खेळण्याची संधी मिळेल,” असे मत व्यक्त केले.
क्रिकेटचा ऑलिम्पिकमधील पुनर्प्रवेश हा केवळ स्पर्धेपुरता मर्यादित नसून, जागतिक स्तरावर क्रिकेटचा विस्तार आणि नव्या देशांमध्ये खेळाची लोकप्रियता वाढविण्यासाठीही मोठे पाऊल मानले जात आहे.
