छत्रपती संभाजीनगर | प्रतिनिधी
महाराष्ट्रासाठी अभिमानाची बाब ठरावी अशी महत्त्वपूर्ण नियुक्ती भारतीय बॉक्सिंग संघटनेने (Boxing Federation of India) जाहीर केली आहे. ग्लासगो (स्कॉटलंड) येथे होणाऱ्या राष्ट्रकुल क्रीडा स्पर्धा २०२६ साठी डॉ. राकेश तिवारी यांची निरीक्षक (Observer) म्हणून नियुक्ती करण्यात आली आहे. भारतीय बॉक्सिंगमधील त्यांच्या दीर्घ अनुभवाची आणि प्रशासकीय कार्यक्षमतेची दखल घेत त्यांच्यावर ही महत्त्वाची जबाबदारी सोपविण्यात आली आहे.
डॉ. राकेश तिवारी हे महाराष्ट्र बॉक्सिंग असोसिएशन (U/s 8) चे सचिव असून राज्यातील बॉक्सिंगच्या विकासासाठी त्यांनी सातत्याने उल्लेखनीय कार्य केले आहे. खेळाडू, प्रशिक्षक आणि संघटनात्मक स्तरावर त्यांनी केलेल्या योगदानामुळे त्यांना राष्ट्रीय स्तरावर विशेष मान्यता मिळाली आहे.
या नियुक्तीबद्दल छत्रपती संभाजीनगर जिल्हा बॉक्सिंग असोसिएशनच्या वतीने डॉ. तिवारी यांचा पुष्पगुच्छ देऊन सत्कार करण्यात आला. यावेळी असोसिएशनचे अध्यक्ष अभिजित देशमुख, सचिव रोहन टाक, उपाध्यक्ष डॉ. चंद्रशेखर चव्हाण तसेच सदस्य राहुल टाक उपस्थित होते. सर्व पदाधिकाऱ्यांनी त्यांचे अभिनंदन करत पुढील जबाबदारीसाठी शुभेच्छा दिल्या.
यावेळी पदाधिकाऱ्यांनी सांगितले की, डॉ. तिवारी यांची राष्ट्रकुल क्रीडा स्पर्धेसाठी झालेली नियुक्ती ही महाराष्ट्रातील बॉक्सिंग क्षेत्रासाठी गौरवास्पद असून राज्यातील युवा बॉक्सर आणि प्रशिक्षकांसाठी ती प्रेरणादायी आहे. त्यांच्या अनुभवाचा आणि नेतृत्वाचा भारतीय बॉक्सिंगला निश्चितच मोठा लाभ होईल, असा विश्वासही त्यांनी व्यक्त केला.
