छत्रपती संभाजीनगर | प्रतिनिधी
पंजाबमधील जालंधर येथे दि. 22 ते 29 जून 2026 या कालावधीत आयोजित यू-15 सब ज्युनिअर राष्ट्रीय बॉक्सिंग स्पर्धेत छत्रपती संभाजीनगर जिल्हा बॉक्सिंग असोसिएशनच्या खेळाडू आराध्य हिवराळे याने दमदार खेळाचे प्रदर्शन करत 43 ते 46 किलो वजनी गटात कांस्यपदक पटकावले. या उल्लेखनीय यशामुळे छत्रपती संभाजीनगर जिल्ह्याच्या क्रीडा क्षेत्रात आनंदाचे वातावरण निर्माण झाले असून जिल्ह्याच्या शिरपेचात आणखी एक मानाचा तुरा रोवला गेला आहे.
स्पर्धेतील प्रत्येक लढतीत आत्मविश्वास, वेगवान पंच आणि उत्कृष्ट तांत्रिक कौशल्याच्या जोरावर आराध्यने प्रतिस्पर्ध्यांना कडवी झुंज दिली. राष्ट्रीय स्तरावर कांस्यपदकाची कामगिरी करत त्याने आपल्या गुणवत्तेची प्रभावी छाप पाडली.
आराध्यच्या या यशामागे प्रशिक्षक सुरज बचके यांचे मोलाचे मार्गदर्शन आणि सातत्यपूर्ण मेहनत लाभली. त्यांच्या प्रशिक्षणामुळेच आराध्यला राष्ट्रीय स्पर्धेत उत्कृष्ट कामगिरी करता आली.
या यशाबद्दल छत्रपती संभाजीनगर जिल्हा बॉक्सिंग असोसिएशनचे अध्यक्ष अभिजीत देशमुख, उपाध्यक्ष डॉ. चंद्रशेखर चव्हाण, सचिव रोहन टाक तसेच सदस्य राहुल टाक यांनी आराध्य हिवराळेचे मनःपूर्वक अभिनंदन करत शुभेच्छा दिल्या.
जिल्ह्यातील युवा खेळाडूंना प्रेरणा देणारी ही कामगिरी असून आगामी काळात आराध्य आणखी मोठ्या स्पर्धांमध्ये महाराष्ट्र आणि देशाचे प्रतिनिधित्व करेल, असा विश्वास क्रीडा क्षेत्रातून व्यक्त केला जात आहे.
