कन्नड | स्पोर्ट्स पॅनोरमा प्रतिनिधी
तालुक्यातील बहिरगाव येथील जिल्हा परिषद प्रशाला शाळेत 21 जून रोजी आंतरराष्ट्रीय योग दिन मोठ्या उत्साहात साजरा करण्यात आला. या उपक्रमात विद्यार्थ्यांनी विविध योगासने आणि प्राणायामाची प्रात्यक्षिके सादर करून योगाचे महत्त्व प्रत्यक्ष अनुभवले.
कार्यक्रमाच्या सुरुवातीला विद्यार्थ्यांनी सामूहिक योगाभ्यास करत ताडासन, वृक्षासन, भुजंगासन, वज्रासन आदी विविध योगासनांचे सादरीकरण केले. तसेच प्राणायामाच्या माध्यमातून शारीरिक आणि मानसिक आरोग्य जपण्याचा संदेश देण्यात आला.
यावेळी शाळेचे क्रीडाशिक्षक श्याम खोसरे यांनी विद्यार्थ्यांना योगाचे शारीरिक, मानसिक आणि बौद्धिक विकासासाठी असलेले महत्त्व सविस्तरपणे समजावून सांगितले. नियमित योगाभ्यासामुळे शरीर तंदुरुस्त राहते, एकाग्रता वाढते तसेच मानसिक तणाव कमी होण्यास मदत होते, असे त्यांनी सांगितले.
विद्यार्थ्यांनीही उत्स्फूर्त सहभाग नोंदवत विविध योगासने आणि प्राणायामाची प्रात्यक्षिके सादर केली. कार्यक्रमातून विद्यार्थ्यांमध्ये योगाबाबत जागरूकता निर्माण झाली असून नियमित योगाभ्यास करण्याचा संकल्प करण्यात आला.
शाळेतील शिक्षक, कर्मचारी आणि विद्यार्थ्यांच्या सहभागामुळे आंतरराष्ट्रीय योग दिनाचा कार्यक्रम उत्साहपूर्ण वातावरणात संपन्न झाला.
