छत्रपती संभाजीनगर, प्रतिनिधी : औरंगाबाद जिल्हा क्रिकेट संघटनेच्या (एडीसीए) निवडणूक प्रक्रियेत अध्यक्षपदासाठी राज्याचे कॅबिनेट मंत्री अतुल सावे (Atul Save) यांची बिनविरोध निवड निश्चित झाली आहे. संघटनेतील व्यापक स्वीकार, दीर्घ प्रशासकीय अनुभव आणि क्रिकेट क्षेत्रातील सातत्यपूर्ण सहभागाच्या जोरावर सदस्यांनी त्यांच्यावर पुन्हा एकदा विश्वास दाखविला आहे.
अध्यक्षपदाची निवडणूक बिनविरोध झाल्याने संघटनेत स्थैर्याचे वातावरण निर्माण झाले असले, तरी उपाध्यक्ष, सचिव, सहसचिव, कोषाध्यक्ष आणि सदस्य पदांसाठीची निवडणूक अत्यंत रंगतदार होणार आहे. त्यामुळे एडीसीएच्या निवडणुकीतील खरी उत्सुकता आता या पदांच्या निकालांकडे केंद्रित झाली आहे.
उपाध्यक्षपदासाठी उमेश डबरी, शिरीष बोराळकर, सचिन मुळे, चक्रधर दळवी, विशाल लोळगे, गौतम नंदावत आणि विष्णू लोखंडे यांच्यात चुरस निर्माण झाली आहे. सचिवपदासाठी विक्रांत भाले, शिरीष बोराळकर, दिनेश कुंटे आणि अनंत नेरळकर हे उमेदवार मैदानात आहेत. सहसचिवपदासाठी अतुल कराड, पवन डोंगरे, विशाल लोळगे, करणसिंग डोग्रा आणि सुधीर भालेराव यांच्यात स्पर्धा रंगणार आहे.
कोषाध्यक्षपदासाठी दिनेश कुंटे, अनिल इरावने, मोहनलाल बोरा, अनंत नेरळकर आणि प्रभुलाल पटेल यांनी दावेदारी कायम ठेवली आहे. सदस्यपदासाठी वसंतभाई शर्मा, हेमंत मुळे, पवन डोंगरे, गौतम नंदावत, चक्रधर दळवी, विष्णू लोखंडे, सुयोग माछर, मोहन बोंबले, निखिल मिटकर, इक्बाल सिद्दीकी, महिंदर सिंग कान्सा, सुशील वकील आणि सुधीर भालेराव यांच्यासह अनेक उमेदवार रिंगणात आहेत.
निवडणुकीच्या पार्श्वभूमीवर विविध गटांकडून सदस्यांशी संपर्क वाढविण्यात येत असून प्रचारालाही वेग आला आहे. अध्यक्षपदावर एकमत झाल्याने संघटनेला एकजुटीचा संदेश मिळाला असला, तरी उर्वरित पदांसाठीची लढत प्रतिष्ठेची मानली जात आहे. त्यामुळे सदस्यांचा कौल कोणाच्या बाजूने झुकतो, याकडे क्रिकेट वर्तुळाचे लक्ष लागले आहे.
एडीसीएच्या आगामी कारभारासाठी नेतृत्वाची दिशा ठरविणारी ही निवडणूक संघटनेच्या भविष्यासाठी महत्त्वाची मानली जात असून, अध्यक्षपदी अतुल सावे यांच्या बिनविरोध निवडीने स्थैर्याचा संदेश दिला आहे. आता उर्वरित पदांच्या निकालातून संघटनेच्या नव्या कार्यकारिणीचे चित्र स्पष्ट होणार आहे.
