अमरावती | प्रतिनिधी: खेळो इंडिया सेंटर, अमरावतीची उदयोन्मुख तिरंदाज कुमकुम अनिल मोहोड हिने भारतीय संघातील सहकारी धीरज बोम्मदेवरा यांच्या साथीने तुर्कीतील अँटाल्या येथे आयोजित करण्यात आलेल्या तिरंदाजी विश्वचषक फेरी (Archery World Cup Stage) 3 स्पर्धेत ऐतिहासिक कामगिरी नोंदवली आहे. रिकर्व्ह मिश्र सांघिक प्रकाराच्या अंतिम सामन्यात भारतीय जोडीने बलाढ्य दक्षिण कोरिया संघाचा पराभव करत सुवर्णपदक पटकावले.
अंतिम फेरीत कुमकुम आणि धीरज यांनी अचूक लक्ष्यभेद, उत्कृष्ट समन्वय आणि शांतचित्त खेळीचे दर्शन घडवत प्रतिस्पर्ध्यांवर वर्चस्व राखले. सामन्याच्या निर्णायक क्षणी भारतीय जोडीने दबावाखालीही उत्कृष्ट कामगिरी करत भारताच्या नावावर सुवर्णपदकाची नोंद केली.
खेळो इंडिया सेंटर, अमरावतीसाठी हे यश अत्यंत अभिमानास्पद मानले जात आहे. कुमकुम मोहोडच्या या कामगिरीमुळे केंद्रातील इतर खेळाडूंनाही प्रेरणा मिळणार असून भारतीय तिरंदाजी क्षेत्रात महाराष्ट्राचे नाव पुन्हा एकदा जागतिक पातळीवर झळकले आहे.
कुमकुम मोहोड आणि धीरज बोम्मदेवरा यांच्या या ऐतिहासिक यशाबद्दल क्रीडा उपसंचालक छत्रपती संभाजीनगर तथा प्रभारी अमरावती शेखर पाटील, क्रीडा क्षेत्रातील मान्यवर, प्रशिक्षक, सहकारी खेळाडू तसेच क्रीडाप्रेमींनी त्यांचे अभिनंदन केले आहे. त्यांच्या या सुवर्ण कामगिरीमुळे संपूर्ण देशाचा अभिमान उंचावला असून भारताचा तिरंगा अँटाल्याच्या मैदानावर सर्वोच्च स्थानी फडकला.
